O noso alumnado de enfermería desfruta dunha sesión formativa de primeiro nivel impartida por Francisco Jesús Represas Carrera
Este enfermeiro especialista en diversos campos sanitarios traballa actualmente na Dirección Xeral de Planificación e Reforma Sanitaria da Consellería de Sanidade, imparte clases na Universidade de Vigo e é Presidente da Asociación Galega de Enfermería Familiar e Comunitaria.
“O traballo dos TCAE é fundamental no medio sanitario: son un elemento imprescindible no equipo de Enfermería“. Esta frase sinxela pero tremendamente motivadora para o noso alumnado marcou un dos momentos álxidos da estupenda sesión formativa que impartiu Francisco Jesús Represas na nosa aula taller de CAE o pasado luns 25 de outubro.
En sesións previas e tras estudar o seu perfil profesional, o noso alumnado traballou en equipos, de forma colaborativa, para crear un guión de preguntas co obxectivo de orientar a sesión cara a aspectos tremendamente interesantes e íntimamente ligados aos contidos de varios módulos do noso Ciclo de CAE.
Así, tomando este guión como base, Francisco Jesús Represas falounos de temas tan diversos como o futuro da vacinación COVID, o traballo dos TCAEs e enfermeiros/-as no medio sanitario e o futuro do SERGAS, incidindo na nova Área Sanitaria Dixital. Ademáis, tamén houbo tempo para falar sobre diabetes e EPOC, contidos sobre os cales o noso invitado xa escribiu varios libros.
Sempre é un pracer contar cun profesional deste nivel na nosa EFA. A súa capacidade para a divulgación non pasou desapercibida para o noso alumnado e traduciuse nunha sesión de gran relevancia que lles permitiu ampliar tanto os seus coñecementos como os seus horizontes profesionais.